तीन मगर स्रष्टा पुरस्कृत

तीन मगर स्रष्टा पुरस्कृत

रातोपाटी, बैशाख १६, २०७५

प्रकाठमाडौं । जितबहादुर सिञ्जाली मगर साहित्य प्रतिष्ठानले मगर भाषा तथा साहित्यमा योगदान पुर्याएका स्रष्टालाई पुरस्कृत गरेको छ । 

प्रतिष्ठानले हरिनास–४, स्याङ्जानिवासी रुद्र ‘सन्देश’ मगरलाई जिबसिम साहित्य पुरस्कार–२०७३, हीरासिंह थापा (सामेसेन) मगरलाई जयबहादुर हितानमगर स्मृति पुरस्कार–२०७३ र निसी–२, बाग्लुङनिवासी लक्ष्मण घर्तीमगरलाई जिबसिम नवप्रतिभा साहित्य पुरस्कार–२०७३ बाट पुरस्कृत गरेको हो । 

ऊर्जा, जलस्रोत तथा सिञ्चाइमन्त्री वर्षमान पुन ‘अनन्त’ ले पुरस्कृत तीन स्रष्टालाई नगदसहित सम्मानपत्र प्रदान गरेका थिए । मन्त्री पुनले पुरस्कृतमध्ये मगर ढुट कवितासंग्रह ‘बिकोलेसा’ (दुख्दोरहेछ २०५६) र मुक्तकसंग्रह ‘आर्मिटमा’ (सम्झना २०६७) का स्रष्टा रुद्र ‘सन्देश’ मगरलाई  ६० हजार, अठार मगर खाम कवितासंग्रह ‘रिहित्ला’ (पैताला) का लेखक लक्ष्मण घर्तीमगरलाई १० हजार नगदसहित सम्मानपत्र प्रदान गरेका थिए । दुवै पुरस्कार मगर भाषाका आदिकवि जितबहादुर सिञ्जाली मगरको नाममा स्थापना गरिएको हो । 

यसैगरी, जयबहादुर हितान मगर स्मृति पुरस्कार–२०७३ बाट लेखक हीरासिंह थापा (सामेसेन) मगर पुरस्कृत भएका हुन् । लेखक मगरले ३० हजार रुपैयाँसहित पुरस्कृत भएका थिए ।

उनी मगर समुदायको उत्थान, भाषा, संस्कृति र इतिहाससम्बन्धी अध्ययेता हुन् । चार दशकदेखि लेख्दै आएका उनको ‘मगर (ढुट)–खस–अंग्रेजी आखर गोमहोक’ (मगर (ढुट) खस–अंग्रेजी शब्दकोश) मगर वृहत् शब्दकोश प्रकाशित छन् ।